انهيار الحوار

من فترة كنت  قريت مقالة رائعة عن أحد مرشحين الرئاسة فى أمريكا اسمه Rick Santorum. المهم  الراجل طلع فى خطاب يقول كلام غريب جداَ أن فى هولندا 10% من الناس بيموتوا بسبب القتل الرحيم (الى هو من الاخر لو واحد عيان و تعبان أوى و بيتعذب، فهو أو حد من أهله يقرر أنه يموته عشان يستريح) و أن نصهم بيتقتلوا القتل الرحيم ده من غير ما حد ياخد رأيهم لدرجة أن الناس فى هولندا بقوا خايفين يروحوا المستشفى ليحصلهم كده.

طبعاَ الكلام ده غريب جداَ و مفيش أى حاجة زى كده فى هولندا. حالات القتل الرحيم نادرة جداَ و تحتاج طلب من المريض و شهادة طبيبين أن حالة المريض مستعصية جداَ. بس يا سيدى فالطبيعى جداَ أن قامت أحد الصحف الأمريكية بعرض الحقائق و الرد على المرشح البهيم.

المشكلة فين بقى؟


 المشكلة أن مؤيدين هذا المرشح مغيروش رأيهم فى المرشح و فهموا أنه راجل متخلف، على الاطلاق لكن غيروا رأيهم فى الجريدة على أنها جريدة فاسدة و منحازة ضده.

المقالة الى أنا قريتها بقى بتقول أن المشكلة ديه أكبر من كده بكتير المشكلة بقت أن الناس بطلت تحاول تفهم أو تفكر و مبقتش مستعدة تغير رأيها مهما جبتلهم أدلة و دى حاجة خطيرة جداَ فى السياسة عشان السياسة أصلا مبنية على الحوار (مش التحوير!!).


طب ده ايه علاقته بينا كمصريين (أو مواطنيين مدينة البهائم) ؟


علاقته هى أن احنا أعدنا كتير أوى محدش بياخد رأينا فى السياسة و مكنش فى حوار أصلاً و بعدين أول ما بقى فكرنا و حوارنا مهم مبقناش مستعدين نفكر أو نتحاور و مبقناش مستعدين نغير رأينا فى أى موضوع مهما شفت أدلة. فمثلاً:


لو شفت فيديو البرادعى و هو بيقول أن مفيش سلاح نووى فى العراق 100 مرة برضه هيفضل البرادعى بالنسبالك هو السبب فى دخول أمريكا العراق.

ده غير الصور و الفيديوهات الفوتوشوب (ده بقى معندهمش فى أمريكا) و الناس الى بتحور و تغير كلامها مليون مرة.

سنحيا خرافاً